Өнөөдөр Монгол улсын ерөнхий сайд, Засгийн газрын тэргүүн У.Хүрэлсүх Хөгжлийн бэрхшээлтэй хүний хөгжлийн ерөнхий газар болон Сэргээн засалт, сургалт үйлдвэрлэлийн төвийн Протез, Ортопедын үйлдвэрийн үйл ажиллагаатай танилцлаа. Монгол улсынхаа нэрээр овоглосон тус үйлдвэр байгуулагдсан цагаасаа хойш 54 жил тасралтгүй үйл ажиллагаа явуулж, хөгжлийн бэрхшээлтэй иргэдийг хэрэгцээт протез, ортопедын хэрэгслээр хангаж байгаа юм. Тус үйлдвэр нь хөгжлийн бэрхшээлтэй иргэдийн хэрэгцээ шаардлагад нийцсэн 35 нэр төрлийн протез ортопедын бүтээгдэхүүн, туслах хэрэгсэл үйлдвэрлэж, давхардсан тоогоор жилдээ 1000-1500 хөгжлийн бэрхшээлтэй хүнд үйлчилдэг байна.

Хөгжлийн бэрхшээлтэй иргэдийн хэрэгцээт протез, ортопедын хэрэгсэлийг халамжийн сангаар дамжуулан иргэдэд үнэ төлбөргүй хийж, олгодог. Ерөнхий сайд У.Хүрэлсүх тус үйлдвэртэй танилцаад 2 гол асуудалд ихээхэн анхаарал хандуулж ажиллах болно гэж мэдэгдлээ. Нэгдүгээрт ахмад настан, хөгжлийн бэрхшээлтэй иргэн, хүүхдэд нийгмийн халамжийн сангаас олгох протез, ортопедын болон тусгай хэрэгслийн жагсаалт, жишиг үнийг зах зээлийн үнэ, ханштай уялдуулан шинэчлэн тогтоох юм. Ингэснээр гол түүхий эд, үйлдвэрлэлийн материалын үнэлгээг нэмэгдүүлж, улсын үйлдвэрийнхээ ашгийг бүрэн хангана.

Хоёрдугаарт хөгжлийн бэрхшээлийн салбар, хөгжлийн бэрхшээлтэй иргэдийн асуудлыг дэмжиж, Протез, ортопедын үйлдвэрийн тоног, төхөөрөмж, хүртээмжийг  засгийн газрын бодлого, үйл ажиллагаагаар  дэмжлэг үзүүлэн анхаарч ажиллана гэлээ.