ХБХХЕГ-ын харьяа Мэргэжлийн боловсрол, ур чадвар олгох сургууль 2021-2022 оны шинэ хичээлийн жилийн нээлтээ хийлээ. Энэ хичээлийн жил цахим тоног төхөөрөмжийн үйлчилгээний ажилтан, нарийн бичгийн дарга, архивын туслах ажилтан, оёдлын мэргэжлээр шинэ элсэлт авч, мөн дохионы хэлмэрч мэргэжлийн хөтөлбөрийг боловсруулж байна.

Мэргэжлийн боловсрол, ур чадвар олгох сургууль нь дохионы хэлмэрч мэргэжлээр богино хугацаанд анхан болон дунд шатны сургалтыг тогтмол явуулж ирсэн. Төрийн байгууллага болон иргэдээс ирсэн саналын дагуу ийнхүү мэргэжил болон өргөжиж байна. Суралцагчидаа хоёрдугаар улирал буюу өвлийн элсэлтээр авах юм.

Тус сургууль нь 45 жилийн хугацаанд түр сургалтаас эхлээд мэргэжлийн боловсрол үйлдвэрлэлийн төв болон өргөжин үйл ажиллагаа явуулж байна. Нийт 140 гаруй суралцагчтай бөгөөд анхаарал дутмаг хэт хөдөлгөөний эмгэг, аутизм, дауны хам шинж, эпилепси, оюун ухааны бэрхшээл, сонсголын бэрхшээл, сурах бэрхшээл, харааны бэрхшээл, хэл ярианы бэрхшээл, хөдлөх эрхтний бэрхшээл,  тархины саажилт зэрэг бүхий л төрлийн хөгжлийн бэрхшээлтэй иргэдэд мэргэжлийн боловсрол олгож байна.

Сургалтын хөтөлбөр нэг жил байсан бол мэргэжлийн нарийн чадвар олгох зорилгоор хоёр жил болон өөрчлөгдлөө.