Жил бүрийн 03 дугаар сарын 03-ны өдрийг ДЭМБ-аас “Сонсгол хамгаалах дэлхийн өдөр” хэмээн зарлаж олон улсад тэмдэглэн өнгөрүүлэхийг уриалдаг.

Дэлхий дээр сонсголын бэрхшээлтэй 466 сая хүн амьдарч байгаагаас 34 сая нь хүүхдүүд байна. Өөрөөр хэлбэл дэлхийн нийт хүн амын 20 хүн тутмын нэг нь сонсголын бэрхшээлтэй бөгөөд энэ тоо цаашид нэмэгдэнэ гэж үздэг. Эмч мэргэжилтнүүдийн үзэж байгаагаар 2050 он гэхэд дэлхийн 900 сая гаруй хүн сонсголын чадвараа алдах болно гэсэн тооцоо бий. Насжилттай холбоотой сонсгол бууралт, сонсголын алдалт үүсч байдаг ба 65-аас дээш насны гурван хүн тутмын нэгнийх нь сонсгол хэвийн бус болдог байна.

Монгол улсад 2018 оны статистик мэдээгээр сонсголын бэрхшээлтэй 8439 хүн байдаг. Үүний 3789 нь эмэгтэй , 4194 нь эрэгтэй, 0-17 насны хүүхэд 671 байна. 

Орчин үеийн техник технологижсон байдал, хүүхэд залуусын чихэвчний зохисгүй, хэтэрсэн хэрэглээ, осол гэмтэл, чих хамар хоолойн үрэвсэлт өвчин, эм тарианы буруу хэрэглээ, гаж нөлөө зэрэг олон шалтгааны улмаас сонсгол бууралт, сонсгол алдалтын тоо нэмэгдэж байна.

ДЭМБ-аас 2020 оны Сонсгол хамгаалах өдрийг “Сонсголын бэрхшээл таныг хязгаарлахгүй...” уриан дор сонсголын бэрхшээл таныг чадварыг хязгаарлах ёсгүй, сонсголын бэрхшээлтэй хүүхдээ хэрхэн дэмжих вэ?, хүүхдийнхээ сонсголын бэрхшээлийг бусдаас бүү нуу, түүнд тохирсон дунгийн суулгац, сонсголын төхөөрөмжийг судлах, сонгох, сонсголын бэрхшээлийнхээ тухай чөлөөтэй илэрхийлэх, санаа зовох, ичих шаардлагагүй зэргээр эерэг зөв мэдээллийг олон нийтэд хүргэхийг чухалчилж байна.

Сонсгол хамгаалах дэлхийн өдрийг угтан бид:

1. Хөгжлийн бэрхшээлтэй хүний хөгжлийн ерөнхий газар Нийслэлийн 9 дүүргийн сонсгол, хэл ярианы бэрхшээлтэй 2700 гаруй иргэдийн овог нэр, РД, хаяг байршил, утасны дугаар зэрэг мэдээллээр статистик бүртгэл судалгааг нэгтгэн боловсруулан, Цагдаагийн ерөнхий газрын Мэдээлэл, шуурхай удирдлагын төвтэй хамтран тусгай дугаарын 101,102,103,105 утсанд сонсгол хэл ярианы бэрхшээлтэй иргэдээс ирүүлэх яаралтай тусламжийн дуудлага, мэдээллийг богино зурвас /sms/-аар цагдаа, онцгой байдал, эмнэлгийн байгууллага цаг алдалгүй хүлээн авах, тусламж хүргэх техникийн боломжийг 2020 оны 02 дугаар сарын 27-ны өдрөөс бий болгон анхны дуудлага мэссэжүүдийг хүлээн авч эхлээд байна.
2. Сонсгол хамгаалах дэлхийн өдрийн талаарх постер, мэдээллийг цахим сайт, фэйсбүүк хуудас зэрэг мэдээллийн хэрэгслүүдээр олон нийтэд сурталчилж байна.
3. Сонсголоо хамгаалахын ач холбогдол, дүлийрэл, сонсгол бууралтаас сэргийлэх талаар Чих хамар хоолойн нарийн мэргэжлийн эмчийн зөвлөгөө, мэдээллийг Eagle, MNC телевизүүдээр хүргэж байна.
4. COVID-19 халдварын талаарх ЭМЯ-аас өдөр тутамд мэдээлж буй мэдээллийг сонсголын бэрхшээлтэй иргэдэд хүртээмжтэй хүргэх зорилгоор Дохионы хэлмэрчтэйгээр хүргэж, хамтран ажиллаж байна.
5. СЗСҮТ-ийн Сэргээн засах төвд хэвтэн эмчлүүлэгчдэд тус өдрийн талаарх мэдээлэл, сонсгол алдалтаас урьдчилан сэргийлэх эрүүл мэндийн боловсрол олгох зөвлөгөөг хүргэн ажиллаж байна.
6. Хөгжлийн бэрхшээлтэй хүүхдийн сэргээн засах хөгжлийн төвөөр үйлчлүүлж байгаа хүүхдүүд тэдний эцэг эхчүүд, асран хамгаалагч нарт "Сонсгол хамгаалах дэлхийн өдөр”-ийн сурталчилгаа, видеог үзүүлж, хүүхдийн чих, хамар хоолойн эмчийн урьдчилан сэргийлэх үзлэг, оношилгоог хийж, зөвлөгөө өгөн ажиллаж байна.