Хөгжлийн бэрхшээлтэй хүний эрхийн тухай хуулийн 32 дугаар зүйлийн хэрэгжилтийг хангах зорилгоор хөгжлийн бэрхшээлтэй хүнийг бие даан амьдрахад нь дэмжлэг үзүүлэх, хувийн туслах бэлтгэх, хөдөлмөрт бэлтгэх чиглэлээр туршилтын судалгааны төслийг “Түгээмэл Хөгжил” төвтэй хамтран 2021 оны 11 дүгээр сарын 25-наас 2022 оны 01 дүгээр сарын 25-ны хооронд хэрэгжүүлсэн төслийн үр дүнг танилцуулах хэлэлцүүлгийг зохион байгуулав.

Хэлэлцүүлгийг ХНХЯ-ны Хөгжлийн бэрхшээлтэй иргэдийн хөгжлийн хэлтсийн дарга Б.Нарангарав нээж үг хэлэв.

Хэлэлцүүлэгт Ерөнхий сайдын Нийгмийн хөгжлийн асуудал хариуцсан зөвлөх Ч.Ундрахбаяр, ХНХЯ-ны Хөдөлмөр эрхлэлтийн хэлтсийн дарга Б.Алтантулга, Сангийн яамны холбогдох мэргэжилтэн, Хөгжлийн бэрхшээлтэй хүний хөгжлийн ерөнхий газрын хөгжил, хөдөлмөрийн асуудал хариуцсан дэд дарга Ц.Нямсүрэн, холбогдох мэргэжилтнүүд болон ХХҮЕГ-ын дэд дарга Т.Бадрахбаяр, Нийслэлийн 9 дүүргийн Хөдөлмөр, халамжийн үйлчилгээний хэлтсийн хөдөлмөрийн албаны дарга, холбогдох мэргэжилтнүүд оролцлоо. Оролцогчдод Түгээмэл хөгжил төвийн удирдлагууд туршилтын төслийн үр дүнг танилцуулж хэлэлцлээ.

Цаашид хөгжлийн бэрхшээлтэй иргэдийн бие даан амьдрах эрхийг хангах, үйлчилгээг хэрхэн тогтвортой хөгжүүлэх, тус үйлчилгээг гүйцэтгэх байгууллагуудын чадавхжуулах, хэрэгцээ шаардлагыг нь зөв оновчтой тодорхойлох, аргачлал боловсруулах, боловсруулсан аргачлалыг олон нийтэд таниулах, сурталчлах ажлыг зохион байгуулах талаар хэлэлцүүлэг өрнүүлэв.

Мөн Хөдөлмөр, нийгмийн хамгааллын сайдын тушаал 2021 оны 11 дүгээр сарын 25-ний өдрийн А/187 тушаалаар батлагдсан Хөгжлийн бэрхшээлтэй хүнийг бие даан амьдрахад нь дэмжлэг үзүүлэх, хувийн туслах, зөвлөлдөх бүлэг буюу харилцан суралцах, зөвлөгөө өгөх үйлчилгээний журам 2022 оны 07 дугаар сарын 01-нээс эхлэн хэрэгжих юм.