Монгол улс 1985 оноос эхлэн хараагүй хүмүүсийн эрхийг хамгаалах “Дэлхийн цагаан таягтны өдөр”-ийг Аравдугаар сарын 15-ны өдөр  тэмдэглэж байна. Тус өдрийг тохиолдуулан Монголын Хараагүйчүүдийн үндэсний холбооноос өдөрлөгийг Мишээл экспогийн өргөтгөл хэсэгт зохион байгуулж байна.  

Энэхүү арга хэмжээгээр Массаж, нүдний эмч нарын үзлэг зөвлөгөө, кофе шопын амтлагаа зэрэг үйлчилгээ мөн тусгай хэрэгсэл, Бэст массаж төвүүдийн үйл ажиллагаа, Спорт хэрэгслийн  үзэсгэлэн, хараагүйчүүдийн хөл бөмбөгийн холбоо, жудо бөх, Пара Шатар даамны холбооны үйл ажиллагаа, мөн ХБХХЕГ-ын харъяа Хараагүй хүмүүсийн хөдөлмөр, сургалт, хөгжлийн төвийн үйлдвэрлэсэн цаасан боодол, оёлдол,мужаан, монгол гэрийн хөнгөн эдлэ  зэрэг бараа бүтээгдэхүүнийг тус тус танилцуулж байна.

Аравдугаар сарын 15-ны энэ өдөр дэлхий нийтэд хараагүй болон сул хараатай хүмүүсийг бие даан амьдрахад нь чухал хэрэгсэл болох цагаан таягны ач холбогдлыг таниулж, хараагүй иргэд өөрийн үзэл бодол дуу хоолойгоо төр засаг, олон нийтэд хүргэн, тулгамдаж байгаа асуудлуудаа хэлэлцэж, шийдвэрлэх арга замуудыг чухалчилдаг. 

Дэлхийн цагаан таягтнуудын өдөр нь баяр биш харин хөгжлийн бэрхшээлтэй иргэд эгэл жирийн хүмүүстэй зэрэгцэн амьдарч буйг сануулах өдөр юм.